Buddsoddi mewn eiddo

Mae eiddo – ar y cyd ag arian parod, bondiau a chyfranddaliad, ymhlith y pedwar math mwyaf cyffredin o fuddsoddiad. Gellir buddsoddi mewn sawl ffordd, o gronfeydd cytun i brynu tŷ i fyw ynddo neu ei osod. Mae’r canllaw hwn yn cwmpasu eich risgiau a’ch buddiannau posibl a ble y gallwch fynd i ddysgu mwy.

• Beth y gall eiddo ei gynnig i fuddsoddwyr?
• Risgiau sy’n gysylltiedig â buddsoddi mewn eiddo
• Prynu eiddo’n uniongyrchol – beth i fod yn wyliadwrus ohono
• Buddsoddi’n anuniongyrchol mewn eiddo drwy gronfa
• Cyn buddsoddi mewn eiddo

Beth y gall eiddo ei gynnig i fuddsoddwyr?

Yn achos eiddo, mae dwy brif ffordd o wneud adenillion:

• Rhent – gallwch ennill incwm drwy osod eiddo i denantiaid
• Gwerthu am elw – os byddwch yn prynu eiddo ac yn ei werthu’n ddiweddarach am bris uwch.

Hyd yn oed os nad ydych am brynu eiddo i chi eich hun, gallwch gael y buddiannau posibl hyn yn anuniongyrchol drwy fuddsoddi mewn cronfa eiddo sy’n buddsoddi’n uniongyrchol mewn eiddo.

Mae ffyrdd cysylltiedig eraill o fuddsoddi hefyd, er enghraifft drwy wasanaethau cynnal a chadw a rheoli eiddo.

Risgiau sy’n gysylltiedig a buddsoddi mewn eiddo

Gall prisiau eiddo a’r galw am eiddo ar rent gynyddu a gostwng, ac mae’n gwneud hynny. Oherwydd hynny, mae buddsoddi’n uniongyrchol neu’n anuniongyrchol mewn eiddo yn ddewis hirdymor. Os ydych yn barod i aros, gallwch dderbyn y colledion mewn marchnad dai araf a gwneud elw unwaith eto pan fydd pethau’n well.

Os ydych wedi gorfuddsoddi mewn eiddo – er enghraifft, os ydych wedi buddsoddi’r rhan fwyaf o’ch arian mewn eiddo prynu i osod, efallai y byddwch mewn dyfroedd dyfnion pan fydd y marchnadoedd tai yn arafu. Er mwyn osgoi hyn, dylech arallgyfeirio eich portffolio drwy fuddsoddi mewn mathau gwahanol o bethau.

Prynu eiddo’n uniongyrchol – beth i fod yn wyliadwrus ohono

Mae llawer o risgiau yn gysylltiedig â phrynu eiddo yn uniongyrchol, boed hynny i chi eich hun neu fel buddsoddiad prynu i osod.

1. Ni allwch gael eich arian yn ôl yn gyflym – yn wahanol i gyfranddaliadau neu fondiau, mae’n cymryd llawer o amser i werthu eiddo.
2. Mae’n ymrwymiad mawr – pan fyddwch yn prynu eiddo, byddwch yn rhoi llawer o’ch wyau yn yr un fasged.
3. Mae costau prynu a gwerthu – dylech ystyried ffioedd asiant tai a syrfëwyr, treth stamp, cyfreithwyr a ffioedd trawsgludo. O 1 Ebrill 2016 bydd unrhyw un sy’n prynu cartref ychwanegol neu eiddo preswyl prynu i osod yn gorfod talu 3% yn rhagor ar ben pob band Treth Stamp.
4. Mae’n waith llafurus – mae cynnal a chadw a rheoli eiddo yn cymryd amser ac arian. Efallai y bydd angen i chi ymestyn y brydles – os nad ydych yn berchen ar y rhydd-ddaliad yn llwyr. Mae hon yn gost arall a gall gymryd rhywfaint o amser i negodi.

Os byddwch yn defnyddio morgais neu fenthyciad i brynu eiddo, mae risgiau ychwanegol:

1. Nid oes sicrwydd y byddwch yn cael digon o rent i ad-dalu’r benthyciad.
2. Efallai y bydd cost y morgais yn cynyddu.
3. Os na fyddwch yn gwneud yr ad-daliadau, gall y banc neu’r gymdeithas adeiladu adfeddiannu’r eiddo.

Buddsoddi’n anuniongyrchol mewn eiddo drwy gronfa

Yn achos cronfa eiddo gyfun (neu ar y cyd), bydd rheolwr proffesiynol yn casglu arian gan lawer o fuddsoddwyr, ac yna’n buddsoddi’r arian yn uniongyrchol mewn eiddo neu mewn cyfranddaliadau eiddo. Mae rheolwyr cronfeydd yn codi ffi am y gwasanaeth hwn, a fydd yn effeithio ar eich enillion.

Mae’r rhain i gyd yn enghreifftiau cyffredin o gronfeydd eiddo:

• Ymddiriedolaethau buddsoddi mewn eiddo tiriog (REITs)
• Cyfranddaliadau mewn cwmnïau eiddo a restrir
• Ymddiriedolaethau buddsoddi eiddo
• Cronfeydd eiddo cwmnïau yswiriant
• Ymddiriedolaethau uned eiddo
• Cwmnïau eiddo alltraeth

Cyn buddsoddi mewn eiddo

Cyn i chi wneud unrhyw benderfyniad ynghylch buddsoddi mewn eiddo, dylech gael cymaint o wybodaeth â phosibl. Gallwch ymchwilio i’r manteision a’r anfanteision posibl ar eich pen eich hun, neu gael cyngor. Byddwch hefyd am ystyried a fyddai math gwahanol o fuddsoddiad yn cyflawni eich nodau yn well. Bydd y canllawiau hyn yn eich rhoi ar ben ffordd:

• Buddsoddi mewn eiddo prynu i osod
• Buddsoddi’n anuniongyrchol mewn eiddo
• Arallgyfeirio – y ffordd ddoeth i gynilo a buddsoddi