Byw ar gyllideb

Mae rheoli arian a chael dau ben llinyn ynghyd pan fyddwch ar incwm isel yn gofyn am waith trefnu gofalus. Rydym wedi casglu ynghyd rhai o’r ffyrdd gorau i wneud yn siŵr eich bod yn defnyddio’r holl driciau posibl i’ch helpu i gadw mewn rheolaeth pan fyddwch ar gyllideb dynn.

• Cyfrifwch eich cyllideb
• Edrychwch ar ffyrdd i gwtogi ar gostau
• Hawliwch yr holl fudd-daliadau mae gennych hawl iddynt
• Benthyciadau brys er mwyn cael dau ben llinyn ynghyd

Cyfrifwch eich cyllideb

Y cam cyntaf wrth gymryd rheolaeth o’ch arian yw cyfrifo eich costau byw, yn cynnwys gwybod beth sy’n dod i mewn, beth sy’n mynd allan a phryd.

Mae llunio cyllideb yn rhoi darlun clir i chi o ble mae eich arian yn mynd, ac yn dangos i chi ble gallai cyfle fodoli i chi arbed arian. Bydd hefyd yn eich helpu i weld p’un ai ydych yn byw o fewn eich incwm ai peidio.

Edrychwch ar ffyrdd i gwtogi ar gostau

Gall fod yn anodd newid faint o arian sydd gennych yn dod i mewn, ond mae gennych fwy o reolaeth dros beth sy’n mynd allan.

Yn ôl ymchwil gan Santander, mae cartrefi yn y Deyrnas Unedig yn gwario cyfartaledd o £3,329 y flwyddyn ar filiau’r dreth gyngor, ynni, trydan, dŵr a band eang. Gallwch dorri cannoedd o bunnoedd oddi ar eich gwariant trwy newid darparwyr gwasanaethau a chwilio am fargen well ar lawer o bethau, yn cynnwys eich siopa a gwyliau.

Hawliwch yr holl fudd-daliadau mae gennych hawl iddynt

Mae’n haws nag y gallech feddwl i wirio eich bod yn derbyn yr holl fudd-daliadau y mae gennych hawl iddynt os ydych ar incwm isel.

Mae rhai budd-daliadau’n daliadau unwaith ac am byth i helpu gyda set benodol o amgylchiadau fel tywydd oer. Mae rhai eraill, fel Cymhorthdal Incwm, yn ychwanegu at eich incwm rheolaidd.

Dilynwch y ddolen isod am olwg gyffredinol ar beth sydd ar gael a sut i weld os ydych ar eich colled.

Benthyciadau brys er mwyn cael dau ben llinyn ynghyd

Mewn rhai amgylchiadau, mae’n bosibl y medrech gael benthyciad di-log gan y llywodraeth i’ch helpu i gael dau ben llinyn ynghyd ar adeg anodd.

Benthyciadau Cyllidebu

Os ydych chi ar incwm isel ac yn hawlio budd-daliadau mae’n bosibl y gallwch dderbyn Benthyciad Cyllidebu di-log oddi wrth y Gronfa Gymdeithasol. Gall hyn helpu gyda phethau fel:

• dodrefn neu offer at y tŷ
• dillad neu esgidiau
• rhent o flaen llaw neu dreuliau symud ar gyfer cartref newydd
• treuliau teithio
• arian i’ch helpu i chwilio am neu ddechrau gwaith
• gwella, cynnal a chadw neu ddiogelu eich cartref.

Benthyciadau eraill

Byddwch yn ofalus dros ben gyda mathau eraill o fenthyciadau. Gall pethau fel benthyciadau diwrnod cyflog, benthyciadau llyfr log a benthyca ar stepen drws ymddangos fel ateb parod, ond gallant waethygu sefyllfa sydd eisoes yn un anodd.

Yn aml, maent yn ddull drud iawn o fenthyca arian – felly ceisiwch bob amser i ganfod ffyrdd eraill o fenthyca.

Gofynnwch i’ch teulu a allan nhw eich helpu, neu ystyriwch ymuno ag undeb credyd. Mae Undebau Credyd wedi eu sefydlu er mwyn cynnig gwasanaethau bancio i bobl a fyddent, fel arall, yn ei chael yn anodd eu cyrchu.