Debydau Uniongyrchol ac archebion sefydlog

Os ydych chi wedi anghofio talu bil erioed, rydych chi’n gwybod bod hynny’n creu llawer o drafferth. Mae Debydau Uniongyrchol ac archebion sefydlog yn newid hynny i gyd – maen nhw’n gwneud yn siŵr bod eich biliau chi’n cael eu talu’n awtomatig. Dysgwch sut a phryd i’w defnyddio, beth yw’r costau a sut mae datrys unrhyw broblemau.

• Y gwahaniaeth rhwng Debydau Uniongyrchol ac archebion sefydlog
• Beth yw Debyd Uniongyrchol?
• Beth yw archeb sefydlog?

Y gwahaniaeth rhwng Debydau Uniongyrchol ac archebion sefydlog

• Mae Debydau Uniongyrchol yn rhoi caniatâd i gwmni gymryd arian o’ch cyfrif banc ar ddyddiad a gytunir. Bydd angen i’r cwmni eich hysbysu ynglŷn ag unrhyw newid yn y swm neu’r dyddiad. Er enghraifft, gallech ddefnyddio Debyd Uniongyrchol i dalu’ch biliau nwy a thrydan.
• Mae archebion sefydlog yn rhoi cyfarwyddyd i fanc dalu union swm penodol i gyfrif arall yn rheolaidd. Er enghraifft, gallech sefydlu archeb sefydlog i dalu’ch rhent.

Beth yw Debyd Uniongyrchol?

Blwch testun: Yn ôl yr Awdurdod Ymddygiad Ariannol, rydych 24% yn llai tebygol o wynebu ffioedd gorddrafft heb eu trefnu os defnyddiwch ap bancio symudol a gwasanaeth rhybuddio drwy neges destun.

Pan sefydlwch Ddebyd Uniongyrchol, rydych yn dweud wrth eich banc neu gymdeithas adeiladu am adael i sefydliad gymryd taliadau o’ch cyfrif.

• Yna gall y sefydliad gasglu faint bynnag sy’n ddyledus iddynt gennych chi, ond mae’n rhaid iddynt ddweud wrthych chi ymlaen llaw (deng niwrnod gwaith fel rheol) faint fyddant yn ei gymryd, pa bryd, a pha mor aml.
• Mae Debydau Uniongyrchol yn ddefnyddiol i dalu biliau rheolaidd, fel nwy neu drydan, yn enwedig os yw’r swm yn newid yn rheolaidd.

Beth sy’n dda amdanyn nhw?

• Arbed amser ac ymdrech. Does dim angen poeni am gofio talu bil a does dim cosbau am dalu’n hwyr.
• Cynilo arian. Mae llawer o ddarparwyr cyfleustodau (fel darparwyr nwy a thrydan) yn rhoi gostyngiad i chi am dalu drwy Ddebyd Uniongyrchol.
• Diogel a sicr. Bydd y banc yn talu unrhyw daliadau anghywir yn ôl i chi.

A oes unrhyw anfanteision?

• Bydd angen i chi gadw rheolaeth ar bethau. Cadwch lygad ar eich Debydau Uniongyrchol a gwnewch yn siŵr fod gennych ddigon o arian i wneud y taliadau - ceisiwch sefydlu trefn atgoffa i chi’ch hun i wirio. Mae hyn yn rhwydd i’w wneud, yn enwedig os oes gennych chi fynediad ar-lein i’ch cyfrif. Os na gallech wynebu costau gan eich banc – gweler ‘Ydyn nhw’n costio unrhyw beth’ isod.

Pwy sy’n gallu eu defnyddio?

Unrhyw un gyda Chyfrif cyfredol a Chyfrif banc sylfaenol. Gellir defnyddio rhai cardiau rhagdaledig neu gyfrifon undeb credyd ond ni ellir gwneud hynny gyda chyfrifon cerdyn Swyddfa’r Post.

Fel rheol mae’n rhaid i chi fod dros 11 oed er mwyn defnyddio Debydau Uniongyrchol, gan ddibynnu ar eich cyfrif, felly holwch eich banc neu eich cymdeithas adeiladu.

Sut i sefydlu Debyd Uniongyrchol

• Bydd y sefydliad sy’n casglu’r taliadau’n dweud wrthych chi beth i’w wneud. Fel rheol rydych chi’n llenwi ffurflen ac yn ei hanfon atynt, neu’n ei sefydlu ar-lein neu dros y ffôn. Byddan nhw’n rhoi gwybod i’ch banc chi.
• Gallwch hefyd ganslo Debyd Uniongyrchol ar unrhyw adeg drwy gysylltu â’ch banc.

Ydyn nhw’n costio unrhyw beth?

• Na. Nid yw banciau’n codi tâl arnoch am wneud neu sefydlu Debydau Uniongyrchol.
• Gwyliwch am daliadau a wrthodir. Os nad oes gennych ddigon o arian yn eich cyfrif i dalu Debyd Uniongyrchol gall eich banc wrthod gwneud y taliad a gall godi tâl arnoch - fel arfer rhwng £5 a £25. Hyd yn oed os byddant yn gwneud y taliad gallech fynd i’r coch heb sylwi – sy’n golygu y bydd raid i chi dalu ffioedd gorddrafft.

Beth os oes problem gyda Debyd Uniongyrchol?

• Mae’r Gwarant Debyd Uniongyrchol yn eich gwarchod chi. Os bydd y banc neu’r sefydliad sy’n casglu’r Debyd Uniongyrchol yn gwneud camgymeriad (fel cymryd y swm anghywir), gallwch gael ad-daliad gan eich banc.
• Os cewch broblem gyda Debyd Uniongyrchol, dylech gysylltu â’ch banc.

Beth yw archeb sefydlog?

Pan sefydlwch archeb sefydlog, rydych chi’n dweud wrth eich banc neu eich cymdeithas adeiladu am wneud taliadau rheolaidd i gyfrif banc neu gymdeithas adeiladu penodol.

• Nid ydynt yr un fath â Debydau Uniongyrchol. Maent yn talu’r union swm a ddewiswch, nid y swm sy’n ddyledus gennych chi i’r sefydliad.
• Gallwch eu sefydlu i ddal ati i dalu am gyfnod amhenodol, neu i orffen ar ddyddiad penodol neu ar ôl cyfres benodol o daliadau.
• Chi sy’n rheoli’n llwyr. Gallwch eu dechrau neu eu stopio neu newid y taliad pryd bynnag rydych chi’n dymuno.
• Mae archebion sefydlog yn ddefnyddiol ar gyfer talu costau sefydlog, fel eich rhent.

Beth sy’n dda amdanyn nhw?

• Maent yn ddefnyddiol pan na allwch ddefnyddio Debyd Uniongyrchol. Er enghraifft, er mwyn gwneud taliadau rheolaidd i unigolyn, fel eich landlord.
• Gallwch eu defnyddio i symud arian rhwng eich cyfrifon eich hun. Gallai hyn fod yn ddefnyddiol, er enghraifft, os oes arnoch eisiau talu swm penodol bob mis i gyfrif cynilo.

Pwy sy’n gallu eu defnyddio?

• Gallwch sefydlu Archebion Sefydlog o Gyfrifon cyfredol a Chyfrifon banc sylfaenol. Gellir defnyddio rhai cardiau rhagdaledig neu gyfrifon undeb credyd ar gyfer Archebion Sefydlog hefyd ond ni ellir gwneud hynny gyda chyfrifon cerdyn Swyddfa’r Post.
• Fel arfer mae’n rhaid i chi fod dros 11 i ddefnyddio archebion sefydlog gan ddibynnu ar eich cyfrif, felly holwch eich banc neu eich cymdeithas adeiladu.

Sefydlwch archeb sefydlog

• Gyda rhai banciau a chymdeithasau adeiladu, gallwch eu sefydlu ar-lein neu dros y ffôn.
• Gallwch lenwi ffurflen archeb sefydlog a’i rhoi i’ch banc. Bydd arnoch angen rhif y cyfrif a chod didoli y person rydych yn ei dalu.
• Gallwch ganslo archeb sefydlog ar unrhyw adeg, neu newid y swm neu ddyddiad y taliad

Ydyn nhw’n costio unrhyw beth?

• Na. Nid yw banciau yn codi ffi arnoch chi am sefydlu archebion sefydlog.
• Gwyliwch am daliadau a wrthodir. Yn union fel gyda Debydau Uniongyrchol, os nad oes gennych ddigon o arian yn eich cyfrif i dalu’r archeb sefydlog gall eich banc wrthod gwneud y taliad a gall godi tâl arnoch - fel arfer rhwng £5 a £25. Hyd yn oed os byddant yn gwneud y taliad gallech fynd i’r coch heb sylwi – sy’n golygu y bydd raid i chi dalu ffioedd gorddrafft.

Sut mae osgoi a datrys problemau gydag archebion sefydlog

• Adolygwch eich archebion sefydlog a thorri’n ôl ar wasanaethau nad oes eu hangen arnoch mwyach.
• Gwiriwch y manylion banc rydych chi’n eu rhoi ddwywaith, a’r swm a’r dyddiad talu.
• Eich cyfrifoldeb chi yw sicrhau bod y taliad am y swm cywir os bydd yn newid. Er enghraifft ar gyfer taliad morgais os yw’r cyfraddau llog yn newid.
• Os cewch chi broblem gydag archeb sefydlog, cysylltwch â’ch banc.