Defnyddio ymddiriedolaeth i leihau eich Treth Etifeddiaeth

Pan roddwch arian neu eiddo i mewn i ymddiriedolaeth, cyn belled â bod rhai amodau’n cael eu bodloni, nid chi sydd berchen arno wedyn. Golyga hyn mae’n bosib na fydd yn cyfrif tuag at eich bil Treth Etifeddiaeth wedi i chi farw. Mae’r canllaw hwn yn egluro’r manteision a’r anfanteision o ddefnyddio ymddiriedolaeth i leihau eich Treth Etifeddiaeth.

Beth yw ymddiriedolaeth?

Trefniant cyfreithiol yw ymddiriedolaeth lle y rhoddwch chi arian, eiddo neu fuddsoddiadau i rywun arall er mwyn iddyn nhw edrych ar eu holau er budd trydydd person. Felly, er enghraifft, gallwch roi peth o’ch cynilion i un ochr mewn ymddiriedolaeth er budd eich plant.

Mae dwy rôl bwysig mewn unrhyw ymddiriedolaeth y dylech chi eu deall cyn parhau i ddarllen.

  • Yr ymddiriedolwr yw’r unigolyn sydd piau’r asedau yn yr ymddiriedolaeth. Mae ganddo’r un pwerau â’r sawl fyddai’n gorfod prynu, gwerthu a buddsoddi yn ei eiddo ei hun. Gwaith yr ymddiriedolwyr yw rhedeg yr ymddiriedolaeth a rheoli eiddo’r ymddiriedolaeth mewn ffordd gyfrifol.
  • Y buddiolwr yw’r unigolyn y sefydlwyd yr ymddiriedolaeth ar ei gyfer ac fel arfer ni chaiff reoli asedau’r ymddiriedolaeth drosto’i hun gan ei fod yn rhy ifanc neu ag anallu i reoli ei arian ei hun. Mae’r asedau a gedwir mewn ymddiriedolaeth yno er budd y buddiolwr.

Beth yw gwaith ymddiriedolaeth?

Cymryd Cyngor

Gall ymddiriedolaeth fod yn ffordd wych o leihau’r dreth y byddwch chi yn ei thalu ar eich etifeddiaeth, ond mae angen cyngor proffesiynol arnoch i gael popeth mewn trefn. Siaradwch â chyfreithiwr bob amser.

Os rhoddwch bethau mewn ymddiriedolaeth yna, cyn belled â bod rhai amodau’n cael eu bodloni, nid chi sydd berchen arnynt wedyn. Golyga hyn, pan fyddwch chi’n marw, ni fydd gwerth y pethau hyn yn cyfrif pan fydd eich bil Treth Etifeddiaeth yn cael ei weithio allan.

Yn hytrach, mae’r arian parod, buddsoddiadau neu’r eiddo yn perthyn i’r ymddiriedolaeth. Mewn geiriau eraill, unwaith y mae’r eiddo mewn ymddiriedolaeth, mae’n sefyll y tu hwnt i ystâd unrhyw un er dibenion treth etifeddiant. Mantais posib arall yw bod ymddiriedolaeth yn fodd o gadw rheolaeth a diogelu asedau ar gyfer y buddiolwr; mae ymddiriedolaeth yn osgoi gorfod trosglwyddo eiddo gwerthfawr, arian parod neu fuddsoddiad ar adeg pan mae’r buddiolwyr yn ifanc neu’n fregus. Yn hytrach, mae gan ymddiriedolwyr ddyletswydd gyfreithiol i ofalu am asedau’r ymddiriedolaeth a’u rheoli ar ran yr unigolyn fydd yn elwa o’r ymddiriedolaeth yn y diwedd.

Pan sefydlwch ymddiriedolaeth chi sydd yn penderfynu ar y rheolau ynglŷn â sut i’w rheoli. Er enghraifft, gallech ddweud na fydd eich plant yn medru defnyddio’r ymddiriedolaeth hyd nes iddynt gyrraedd 25 oed.

Pa fathau o ymddiriedolaethau sy’n bodoli?

Mae nifer o fathau gwahanol o ymddiriedolaethau:

Gallwch ysgrifennu rhai i mewn i’ch ewyllys, tra gallwch sefydlu rhai yn syth. Mae rhai ymddiriedolaethau’n atebol i’w gweithdrefnau treth etifeddiant eu hunain ac unwaith y mae asedau wedi’u trosglwyddo’n llwyddiannus i mewn i ymddiriedolaeth, nid ydynt mwyach yn destun treth etifeddiant wedi i chi farw. Mae rhai eraill yn talu treth incwm a threth ar enillion cyfalaf ar gyfraddau uwch, felly mae’n bwysig gwybod pa fath o ymddiriedolaeth sydd gennych.

Mae’r math o ymddiriedolaeth a ddewiswch yn dibynnu ar beth yw ei bwrpas i chi. Dyma rai o’r dewisiadau mwyaf cyffredin.

  • Ymddiriedolaeth syml – y math symlaf o ymddiriedolaeth, mae ymddiriedolaeth yn rhoi popeth i’r buddiolwr yn syth (os ydynt dros 18 oed).
  • Ymddiriedolaeth diddordeb mewn meddiant – gall y buddiolwr gael peth o’r incwm o’r ymddiriedolaeth yn syth, ond nid oes ganddo’r hawl i gael yr arian, yr eiddo na’r buddsoddiadau sy’n creu’r incwm hwnnw. Bydd yn rhaid i’r buddiolwr dalu treth incwm ar yr incwm a dderbyniwyd. Gallwch sefydlu’r math hwn o ymddiriedolaeth ar gyfer eich partner, gyda’r dealltwriaeth y bydd y buddsoddiadau yn cael eu trosglwyddo i’ch plant chi pan fydd eich partner yn marw. Mae hwn yn strwythur ymddiriedolaeth poblogaidd a ddefnyddir mewn ewyllysiau pobl sy’n ailbriodi, ond sydd â phlant o’u priodas gyntaf.
  • Ymddiriedolaeth ddiamod – mae gan yr ymddiriedolwyr hawl lwyr i benderfynu sut i ddosbarthu asedau’r ymddiriedolaeth. Gallech sefydlu’r math hwn o ymddiriedolaeth ar gyfer eich wyrion gan adael i’r ymddiriedolwyr (sef rhieni’r wyrion efallai) benderfynu sut i rannu’r incwm a’r cyfalaf rhwng yr wyrion. Bydd gan yr ymddiriedolwyr y gallu i wneud penderfyniadau buddsoddi ar ran yr ymddiriedolaeth.
  • Ymddiriedolaeth gymysg – yn cyfuno elfennau o wahanol fathau o ymddiriedolaethau. Er enghraifft, gall buddiolwr fod â diddordeb mewn meddiant (hy hawl i incwm o) yn hanner cronfa’r ymddiriedolaeth a gall hanner arall y gronfa ymddiriedolaeth fod yn ymddiriedolaeth ddiamod.
  • Ymddiriedolaeth ar gyfer person bregus – os mai person bregus yw’r unig un i elwa o’r ymddiriedolaeth, – er enghraifft, rhywun ag anabledd neu blentyn amddifad – yna mae llai o dreth i’w thalu fel arfer ar incwm ac elw o’r ymddiriedolaeth.
  • Ymddiriedolaeth preswylwyr allanol – ymddiriedolaeth pan mae’r holl ymddiriedolwyr yn byw y tu allan i’r DU. Weithiau gall hyn olygu nad yw’r ymddiriedolwyr yn talu dim treth neu leihad mewn treth ar incwm o’r ymddiriedolaeth.

Eisiau sefydlu ymddiriedolaeth?

Gallwch sefydlu ymddiriedolaeth yn syth neu ysgrifennu un yn eich ewyllys. Pan fyddwch yn sefydlu ymddiriedolaeth rhaid i chi ddatgan yn glir:

  • Pa bryd fydd yr ymddiriedolaeth yn weithredol – yn syth, neu wedi i chi farw?
  • Pwy yw’r ymddiriedolwyr a’r buddiolwyr, a
  • Beth yw asedau’r ymddiriedolaeth

Bydd nifer o bobl sydd yn sefydlu ymddiriedolaeth yn eu hewyllys yn enwi ysgutor yr ewyllys fel yr ymddiriedolwr, ond nid yw’n ofynnol gwneud hyn.

Angen mwy o wybodaeth?

Mae cyfraith ymddiriedolaeth yn gymhleth ac os na fyddwch yn ofalus gallech wynebu costau treth ar unwaith. I sicrhau eich bod yn gwneud pethau yn gywir, mae’n hanfodol eich bod yn cael cyngor proffesiynol cyn sefydlu ymddiriedolaeth. Siaradwch â chyfreithiwr bob amser.

A oedd y canllaw hwn o ddefnydd i chi?