Gwerthiannau tai cyflym

Os oes angen ichi werthu’ch tŷ ar frys efallai’ch bod yn ystyried defnyddio cwmni ‘gwerthu’n gyflym’ - darllenwch ymlaen i sicrhau eich bod yn deall y peryglon Maent yn cynnig prynu’ch tŷ o fewn cyn lleied ag wythnos am bris gostyngedig. Fodd bynnag, mae yna bryderon y gallai perchnogion tai yn cael eu camarwain ac yn colli allan yn ariannol. Darllenwch ymlaen i sicrhau eich bod yn gwybod beth ydych yn ei wneud.

Beth yw cwmnïau sy’n gwerthu tai’n gyflym?

Mae cwmnïau sy’n gwerthu tai’n gyflym yn cynnig naill ai i brynu’ch tŷ neu i ddod o hyd i drydydd parti ichi’n gyflym iawn, gan dalu arian parod am eich eiddo, fel arfer ar ostyngiad ar werth llawn y farchnad.

Manteision ac anfanteision defnyddio cwmni sy’n gwerthu tai’n gyflym

Manteision

Maent yn darparu gwasanaeth defnyddiol ar gyfer perchnogion tai sydd angen datgloi arian parod ar frys. Er enghraifft er mwyn:

  • Osgoi ailfeddiannu, clirio dyledion neu ddatrys problem ariannol
  • Cael gwared ar eiddo a etifeddir
  • Symud oherwydd rhesymau cysylltiedig ag oedran neu iechyd
  • Gwerthu o ganlyniad i ysgariad neu berthynas yn chwalu
  • Adleoli oherwydd newid swydd neu i allfudo
  • Ceisio llwybr gwahanol os nad yw’n bosibl gwerthu trwy asiant tai traddodiadol. Osgoi problemau sydd wedi golygu bod eiddo’n anodd i’w werthu, er enghraifft un gyda phrydles fer neu os oes gan eiddo berygl uchel o lifogydd

Anfanteision

Gwyliwch am fasnachwyr diegwyddor

Llofnododd un gwerthwr ddêl gyda chwmni sy’n gwerthu tai’n gyflym gan gytuno ar bris o £75,000, ond y diwrnod cyn bod y symudwyr dodrefn i fod i gyrraedd, lleihaodd y cwmni eu cynnig i £40,000.

Ffynhonnell: BBC, 2012

  • mae rhai cwmnïau’n cytuno i brynu tŷ, ond wedyn maent yn lleihau’r pris ar y munud olaf un
  • ni wneir strwythurau ffioedd yn glir i’r cwsmer bob tro
  • mae rhai cwmnïau’n gwneud prisiadau ffug ar eiddo
  • mae rhai contractau’n clymu cwsmeriaid i mewn, gan eu hatal rhag gwerthu i rywun arall a allai gyflwyno cynnig gwell

A yw defnyddio cwmni sy’n gwerthu tai’n gyflym yn gywir i chi?

I ateb y cwestiwn hwn, mae angen ichi ystyried pam rydych yn gwerthu a beth yw eich blaenoriaethau.

Os yw gwerthu’ch eiddo’n gyflym yn bwysicach na chael y pris gorau, yna efallai y byddwch yn penderfynu bod defnyddio un o’r cwmnïau hyn yn werthchweil. Fodd bynnag, byddwch yn barod i gael oddeutu 75% o werth eich eiddo.

Cyn penderfynu ar symud ymlaen, sicrhewch eich bod wedi ystyried yr holl bosibiliadau eraill a darllenwch ein hawgrymiadau defnyddiol (gweler isod).

Dewisiadau eraill yn lle gwerthu tŷ’n gyflym

Defnyddiwch asiant tai traddodiadol

Cyn penderfynu ar symud ymlaen gyda chwmni sy’n gwerthu tai’n gyflym, gofynnwch i rai asiantwyr tai lleol pa bris fyddai’n cael gwerthiant cyflym ichi.

Efallai y byddwch yn canfod bod y swm y bydd angen ichi leihau’r pris yn llai na’r gostyngiad nodweddiadol o 25% y byddai cwmni sy’n gwerthu tai’n gyflym yn gofyn amdano.

Trafodwch gyda’ch cwmni morgais

Os mai brwydro i gadw i fyny â’ch taliadau morgais yw’r rheswm rydych yn gwerthu, dylech gysylltu â’ch darparwr benthyciad er mwyn trafod eich opsiynau. Mae’n rhaid i gwmnïau morgais ystyried cais i newid y ffordd rydych yn talu’ch morgais.

Un o’r pethau y gallent ei awgrymu yw ymestyn cyfnod eich morgais (faint o amser sydd ar ôl ar y morgais) er mwyn lleihau eich taliadau misol.

Ystyriwch ffyrdd eraill i ariannu eich gofal hirdymor

Os mai talu am eich gofal hirdymor yw’r rheswm rydych yn gwerthu’ch cartref, gwnewch yn siŵr eich bod wedi ystyried yr holl bosibiliadau eraill a’ch bod wedi siarad â chynghorydd ariannol annibynnol sy’n arbenigo mewn ariannu gofal hirdymor.

Awgrymiadau defnyddiol os ydych yn mynd ymlaen i werthu’ch tŷ’n gyflym

Os penderfynwch yr hoffech werthu’ch eiddo trwy gwmni sy’n gwerthu tai’n gyflym, dilynwch yr awgrymiadau hyn:

  • Gwnewch eich prisiad eich hunan. Gwnewch yn siŵr eich bod yn cael prisiad gan dri asiant tai gwahanol fel y gallwch benderfynu a yw unrhyw gynnig a wneir gan gwmni sy’n gwerthu tai’n gyflym yn deg.
  • Siopwch o gwmpas. Nid yw pob gwmni sy’n gwerthu tai’n gyflym yr un peth. Gwnewch yn siŵr eich bod yn ystyried beth y gall gwahanol gwmnïau ei gynnig.
  • Gwiriwch fanylion y cwmni. Os yw’r darparwr yn frocer (rhywun sy’n eich cyflwyno i brynwr posibl), gwiriwch eu bod wedi’u cofrestru gyda naill ai Yr Ombwdsmon Eiddo neu Wasanaethau Ombwdsmon: Eiddo. Os dywed y darparwr eu bod wedi cytuno i god ymarfer, neu eu bod wedi’u rheoleiddio gan gorff swyddogol, gwiriwch drostoch eich hunan.
  • Peidiwch â bod yn swil. Bob amser mae’n werth trafod y telerau ac/neu’r pris.
  • Sicrhewch fod popeth yn ysgrifenedig. Peidiwch â derbyn addewidion ar lafar.
  • Cymerwch eich amser. Peidiwch â brysio na bod dan bwysau i benderfynu.
  • Trefnwch eich cynghorydd ariannol annibynnol eich hunan. Ni all y cwmni rydych yn ei ddefnyddio’ch gorfodi i ddefnyddio’r cynrychiolydd cyfreithiol maent yn ei argymell. Gweler isod ynghylch ble i ddod o hyd i gyfreithiwr.
  • Darllenwch y cytundeb yn ofalus. Peidiwch â llofnodi cytundeb oni bai eich bod yn deall yn llawn yr hyn rydych yn cytuno iddo. Gofynnwch i’ch cynghorydd ariannol egluro unrhyw beth nad ydych yn ei ddeall.
  • Osgowch gael eich clymu i mewn am gyfnodau hir. Peidiwch â llofnodi unrhyw gytundeb sy’n eich clymu i’r cwmni sy’n gwerthu tai’n gyflym am amser maith. Mae contract nodweddiadol gydag asiantaeth tai’n parhau am 8-12 wythnos. Dylai contract i werthu’n gyflym fod yn fyrrach na hwnnw.
  • Byddwch yn onest. Gallai rhoi gwybodaeth anghywir neu adael pethau pwysig allan achosi oedi nes ymlaen a hyd yn oed gallent olygu gostyngiad yn y pris a gynigir ichi.
  • Gofynnwch am weld yr arolwg. Os yw’r cwmni rydych yn ei ddefnyddio’n gostwng pris y cynnig, gofynnwch pam. Os yw casgliadau’r arolwg ar fai, gofynnwch am eu gweld. Ni fydd cwmni sy’n masnachu’n deg yn eu cuddio rhagoch.
  • Peidiwch ag ymrwymo’n rhy gynnar yn y broses. Peidiwch â llofnodi’r cytundeb nes bod yr holl arolygon a gwiriadau cyfreithiol wedi’u gwneud ac mae gennych gynnig terf ynol mewn ysgrifen.

Dod o hyd i gyfreithiwr

Cwestiynau i’w gofyn i’ch asiant

Ar bob cam o’r broses, gwnewch yn siŵr bod gennych yr holl wybodaeth sydd ei hangen arnoch a’ch bod yn deall popeth. Dyma rai cwestiynau i ofyn i’r cwmni sy’n gwerthu tai’n gyflym.

  • A yw’r cwmni’n prynu’r eiddo eu hunain neu a yw rhywun arall yn ei brynu?
  • Os mai nhw sy’n ei brynu, sut fyddant yn talu amdano? Os dywed y cwmni fod ganddo arian ar gael ar unwaith, gofynnwch am dystiolaeth. Bydd prynwr dilys ag arian parod yn gallu ei darparu.
  • Os mai rhywun arall yw’r prynwr, pwy ydynt a pha warantau allant eu rhoi ynghylch pa mor gyflym y gall y gwerthiant ddigwydd ac a oes gan y prynwr arian ar gael?
  • Beth yw’r amserlenni ar gyfer y gwerthiant? Beth yw’r gwahanol gamau a phryd fydd pob un yn digwydd? Beth allai achosi oedi i’r amserlenni?
  • Pwy sy’n prisio’r eiddo a sut?
  • Beth allai achosi i bris y cynnig newid a phryd fyddai hyn yn digwydd? A yw’r cynnig yn amodol, er enghraifft a yw’n ‘amodol ar arolwg a chontract’ neu rywbeth arall?
  • Pa ffioedd a chostau fydd rhaid i chi eu talu (er enghraifft arolygon a ffioedd cyfreithwyr)?. Beth yw’r ffioedd a’r costau os na chwblhewch y gwerthiant?

A oes gennych broblem gyda’ch cwmni sy’n gwerthu tai’n gyflym?

Os nad ydych yn fodlon ar y gwasanaeth a ddarperir gan gwmni sy’n gwerthu tai’n gyflym, rhowch wybod iddynt a rhoi cyfle iddynt archwilio a datrys eich cwyn.

Os nad ydych yn hapus â’r ffordd yr ymdrinir â’ch cwyn, gallwch gyfeirio’r mater at:

A oedd y canllaw hwn o ddefnydd i chi?