Taliadau Credyd Cynhwysol ar y cyd i gyplau

Os ydych yn byw fel cwpl ac yn hawlio Credyd Cynhwysol, cewch daliad misol sengl ar gyfer eich cartref felly gallech orfod gwneud rhai newidiadau i’r ffordd yr ydych yn cyllidebu. Mae’r dudalen hon yn egluro rhagor i chi am hawliadau Credyd Cynhwysol.

Sut mae Credyd Cynhwysol yn effeithio ar gyplau?

Gwnewch y mwyaf o’ch taliad Credyd Cynhwysol ar y cyd gyda help personol gan ein hofferyn Rheolwr Arian.

Mae Credyd Cynhwysol yn raddol yn disodli rhai budd-daliadau a chredydau treth presennol i bobl o oed gwaith sydd un ai’n ddi-waith neu ar incwm isel.

Gallwch gyflwyno hawliad ar wahân neu gyda’ch gilydd. Os byddwch yn cwblhau’r ffurflen ar-lein ar ran eich priod neu bartner bydd angen i chi roi ei fanylion ef neu hi.

Dysgwch ragor am ba fudd-daliadau sy’n cael eu disodli a sut mae Credyd Cynhwysol yn gweithio yn ein canllaw Egluro Credyd Cynhwysol

Os ydych yn gweithio

Os yw’r naill neu’r ddau ohonoch yn gweithio, gallech fedru hawlio Credyd Cynhwysol os yw cyflog y ddau ohonoch gyda’i gilydd yn llai na £541 y mis.

Os bydd un ohonoch yn hawlio budd-daliadau

Ar hyn o bryd, ni fyddwch yn medru hawlio Credyd Cynhwysol os oes un ohonoch eisoes yn cael:

  • Lwfans Ceisio Gwaith (JSA)
  • Lwfans Cyflogaeth a Chymorth (ESA)
  • Budd-dal Analluogrwydd (IB)
  • Lwfans Anabledd Difrifol (SDA)
  • Lwfans Byw i’r Anabl (DLA)
  • Taliad Annibyniaeth Bersonol (PIP)

Os bydd un ohonoch yn hawlio credydau treth

Ffoniwch y Llinell Gymorth Credydau Treth

Ffoniwch y Llinell Gymorth Credydau Treth ar 0345 300 3900 neu ysgrifennwch i’r Swyddfa Credyd Treth i ddweud wrthynt eich bod bellach yn hawlio Credyd Cynhwysol.

Os ydych yn hawlio Credyd Cynhwysol ac yn dechrau byw gyda phartner sy’n hawlio credydau treth, ni fydd yn medru parhau i’w cael mwyach.

Y rheswm am hyn yw bod Credyd Cynhwysol yn seiliedig ar incwm y cartref ac ni allwch hawlio Credyd Cynhwysol a chredydau treth ar yr un pryd.

Yn hytrach bydd angen i’r ddau ohonoch wneud cais ar y cyd am Gredyd Cynhwysol.

Unwaith y byddwch yn cyflwyno’r hawliad, bydd y credydau treth yn dod i ben ac efallai y bydd angen i chi feddwl am sut y byddwch yn ymdopi’n ariannol hyd nes i chi gael eich taliad Credyd Cynhwysol cyntaf ar y cyd.

Sut y telir Credyd Cynhwysol i gyplau

I dderbyn taliadau Credyd Cynhwysol, bydd angen i chi gael cyfrif banc neu gymdeithas adeiladu neu undeb credyd a all wneud taliadau neu eu derbyn.

Bydd angen i chi enwebu i ba gyfrif y dylid talu’ch arian a gall hyn fod naill ai:

  • yn gyfrif sengl yn eich enw chi neu yn enw eich partner
  • yn gyfrif ar y cyd yn enw’r ddau ohonoch.

Dewis cyfrif sy’n addas ar gyfer Credyd Cynhwysol

Pa un ai’ch bod yn mynd am gyfrif ar y cyd neu gadw’ch arian ar wahân, bydd angen i chi sicrhau bod y cyfrif a ddewiswch yn addas i chi a’ch taliadau Credyd Cynhwysol.

Dysgwch pa gyfrifon sy’n iawn ar gyfer Credyd Cynhwysol yn ein canllaw Dewis cyfrif banc ar gyfer eich taliadau budd-dal.

A ddylech chi agor cyfrif ar y cyd?

Gall cael cyfrif ar y cyd ei gwneud hi’n llawer haws i chi gyllidebu. Mae’n rhoi rheolaeth gyfartal i chi dros yr arian, ond mae yna ambell beth fydd angen i chi ei ystyried cyn i chi fwrw ymlaen i agor un.

Pan mae cyfrif ar y cyd yn syniad da

  • rydych eich dau yn debyg iawn o ran syniadau am arian ac mae gennych batrymau gwario, arferion ac ymddygiad tebyg
  • gallwch gytuno ar gyllideb a chynllun gwario
  • gallwch drafod arian gyda’ch partner heb ffraeo
  • gallwch gytuno ar y rheolau sylfaenol ar gyfer gwario, er enghraifft, pryd fydd hi’n iawn i fwrw ymlaen a phrynu rhywbeth a phryd fydd angen i chi ei drafod gyda’ch partner yn gyntaf.

Pan nad yw cyfrif ar y cyd yn syniad da

  • os oes gan un ohonoch broblem gyda gorwario ac yn ei chael hi’n anodd cadw at gyllideb
  • os oes gan eich partner hanes credyd gwael.

Ni fydd byw gyda rhywun yn unig, neu fod yn briod ag ef neu hi, yn effeithio ar eich sgôr credyd ond cyn gynted ag yr agorwch chi gyfrif banc ar y cyd, cewch eich ‘sgorio ar y cyd’. Gallai hyn effeithio ar eich statws credyd.

Rydych yn atebol ar y cyd am unrhyw ddyledion a gymerir yn enw’r ddau ohonoch. Felly, os bydd eich partner yn mynd i orddrafft ar gyfrif banc ar y cyd, byddwch chithau hefyd yn gyfrifol am ei glirio.

Am ragor o bethau i chi eu hystyried pan fyddwch yn penderfynu a ydych am reoli’ch arian gyda’ch gilydd neu beidio, gweler ein canllaw A ddylech reoli arian ar y cyd neu ar wahân?

Rheoli arian fel cwpl ar Gredyd Cynhwysol

Cynllunydd cyllideb

Lluniwch gyllideb y cartref gyda’ch gilydd os nad ydych wedi gwneud hynny eisoes. Ewch i’n Cynllunydd cyllideb

Gall fod yna rai pethau y bydd angen i chi eu gwneud yn wahanol pan fyddwch yn cael Credyd Cynhwysol a gallech orfod gwneud rhai newidiadau.

Efallai’ch bod yn cael eich talu’n wythnosol neu’n cyllidebu’n wythnosol. Dan y system newydd, bydd angen i chi ddod i arfer â chael taliad misol yn hytrach.

Os cewch help gyda’ch rhent, cewch swm am gostau tai yn eich taliad misol sengl. Chi fydd yn gyfrifol am dalu’ch landlord eich hun.

Mae’n syniad da ystyried sefydlu taliadau awtomatig (fel archebion sefydlog neu Ddebydau Uniongyrchol) ar gyfer eich holl filiau rheolaidd ar ôl i chi gael eich taliad Credyd Cynhwysol cyntaf.

Lluniwch gyllideb y cartref gyda’ch gilydd os nad ydych wedi gwneud hynny eisoes.

Gallwch ddefnyddio’n cynllunydd Cyllideb i edrych ar faint o arian sydd gennych yn dod i mewn ac yn mynd allan.

Bydd hyn yn eich helpu i gyfrifo:

  • faint sydd arnoch ei angen ar gyfer taliadau hanfodol
  • pwy fydd yn gyfrifol am dalu’r biliau, rhent neu forgais
  • faint fydd ar ôl i’w rannu rhyngoch ar gyfer gwariant personol.

Siarad am arian fel cwpl

Gall siarad am arian gyda’n partneriaid fod yn beth anodd ei gael yn iawn. Ac i rai ohonom, gall hyd yn oed fod yn sail i ddadleuon a rhwystredigaeth.

Ond os byddwch yn mynd ati’r ffordd iawn, ac yn dilyn ychydig awgrymau ar beth i’w wneud a beth i’w osgoi, buan iawn y gwelwch cymaint gwell ydych chi’n teimlo pan fydd cyllid eich teulu mewn trefn ac unrhyw faterion yn yr agored.

Os ydych yn pryderu am daliadau Credyd Cynhwysol

Gall dibynnu ar un taliad ar y cyd achosi problemau i rai cyplau.

Os ydych chi’n poeni ynglŷn â’ch partner yn cymryd rheolaeth o’r arian a’ch gadael heb unrhyw fynediad at arian, mae’n bwysig gwybod fod hyn yn fath o gamdriniaeth ariannol. Does dim rhaid i chi ei ddioddef na chadw’n dawel.

Os oes gan eich partner broblemau iechyd meddwl neu’n camdrin cyffuriau neu alcohol, gallai hyn hefyd arwain ato ef neu hi’n cymryd arian a roesoch i un ochr ar gyfer pethau hanfodol neu at orwario’n anghyfrifol.

Os ydych yn poeni am unrhyw un o’r materion hyn, siaradwch â’ch hyfforddwr gwaith neu’r llinell gymorth Credyd Cynhwysol a gofyn am Drefniant Talu Amgenach.

Gallai hyn fod un ai’n:

  • Daliad a Rennir – rhennir eich taliad Credyd Cynhwysol rhyngoch a’i dalu i mewn i gyfrifon banc ar wahân
  • Taliad ar wahân – mae’r cyfan o’ch taliad Credyd Cynhwysol yn mynd i mewn i’ch cyfrif chi

Llinell gymorth credyd cynhwysol

Mae’r llinell gymorth Credyd Cynhwysol ar gael o Ddydd Llun i ddydd Gwener 8am i 6pm.

Ffoniwch 0345 600 0723
Welsh language (make a claim): 0800 012 1888
Welsh language (report changes): 0345 600 3018
Textphone: 0345 600 0743

Dysgwch am gostau galwadau

A oedd y canllaw hwn o ddefnydd i chi?