Yswiriant car – sut i gael y fargen orau

Mae cost yswiriant car wedi codi’n raddol dros yr ychydig flynyddoedd diwethaf. Ydych chi’n gwneud y mwyaf o safleoedd cymharu ar-lein, erthyglau bargen orau a broceriaid yswiriant? Dilynwch ein pum cam syml a gallech arbed cannoedd o bunnoedd i’ch hun.

• 1. Gostwng eich Risg
• 2. Gostwng y pris
• 3. Chwiliwch am y fargen orau
• 4. Gwiriwch y polisi
• 5. Gofynnwch am ddisgownt

1. Gostwng eich Risg

Mae nifer o bethau y gallwch chi eu gwneud i ostwng eich risg yswiriant a gwthio’r pris i lawr.

Gwneud eich car yn fwy diogel

• Parcio mewn modurdy neu dramwyfa os oes modd.
• Ffitio larwm neu lonyddwr cymeradwy.
• Gwneud yn siŵr fod dyfeisiau diogelwch wedi’u cymeradwyo gan Thatcham.

Dysgu mwy ar wefan ddiogelwch Thatcham.

Gyrru model cyffredin

• Dewis gwneuthuriad a model o grŵp yswiriant isel am bremiwm is.
• Mae’n well gan yswirwyr fodelau poblogaidd nad ydynt mor ddrud i’w hatgyweirio.

Bod yn gywir am eich milltiroedd

• Isaf i gyd yw’ch milltiroedd blynyddol, isaf i gyd fydd eich premiwm. Fodd bynnag, peidiwch ag amcangyfrif eich milltiroedd yn rhy isel oherwydd gallai hynny annilysu’ch yswiriant pan gyflwynwch hawliad.

Gyrru’n ofalus

• Profwch eich bod chi’n yrrwr risg isel – bydd rhai yswirwyr yn rhoi disgownt ichi os ydych chi wedi cymryd Pass Plus neu gwrs gyrru uwch. Gallwch gael gwybod rhagor am Pass Plus ar wefan GOV.UK
• Bydd hawliadau yswiriant neu bwyntiau ar eich trwydded yn cynyddu’ch premiwm.
• Ystyriwch gael polisi sy’n cynnwys asesiad o’ch gyrru gyda thelemateg (technoleg ‘blwch du’). Os gallwch brofi eich bod yn yrrwr gofalus, gallech gael premiwm is.

Ychwanegu ail yrrwr

• Lliniarwch y risg trwy ychwanegu ail yrrwr risg isel – hyd yn oed os nad ydynt yn defnyddio’r cerbyd rhyw lawer. (Bydd ychwanegu gyrwyr ifanc newydd gymhwyso’n cynyddu’r premiwm).
• Peidiwch â thorri’r gyfraith trwy esgus mai’r ail yrrwr yw’r prif yrrwr.

2. Gostwng y pris

• Mae rhai pethau y gallwch chi eu gwneud a allai ostwng pris eich yswiriant car.
• Weithiau bydd eich yswiriwr neu frocer yn ceisio gwerthu ychwanegiadau i chi, fel yswiriant costau cyfreithiol. Mae’n bosibl y gallech gael y rhain yn rhatach rhywle arall, neu efallai na fyddwch eu hangen o gwbl.

Talwch yn flynyddol, nid yn fisol

• Gwiriwch gyda’ch cwmni yswiriant oherwydd weithiau codir llog arnoch os byddwch yn talu mewn rhandaliadau.
• Gallech arbed hyd at £125 ar bremiwm £700 trwy dalu yn flynyddol. (Ffynhonnell: Which?)

Peidiwch â thalu am rywbeth nad oes arnoch ei angen

• Ystyriwch yr yswiriant sydd gennych o dan bolisïau yswiriant eraill neu mewn mannau eraill. Er enghraifft, mae rhai cyfrifon banc yn cynnwys yswiriant car yn torri i lawr.

Ystyried prynu yswiriant torri i lawr ar wahân

• Os caiff yswiriant torri i lawr ei gynnwys yn eich yswiriant car, gwiriwch bris a lefel y sicrwydd – efallai y gwelwch chi yswiriant gwell am yr un pris neu lai yn rhywle arall.

Diogelu neu gynyddu’ch bonws dim hawliadau

• Wrth newid yswirwyr, gwnewch yn siŵr eich bod yn trosglwyddo’ch bonws dim hawliadau.
• Ystyriwch dalu premiwm ychwanegol i ddiogelu’ch bonws dim hawliadau os nad ydych chi wedi gwneud hawliad am bum mlynedd neu’n fwy.

Ystyriwch ychwanegu tâl-dros-ben gwirfoddol

• Ychwanegwch dâl-dros-ben gwirfoddol at eich tâl-dros-ben gorfodol i ostwng eich premiwm.
• Cofiwch, byddwch chi’n cael llai yn ôl os byddwch chi’n gwneud hawliad (ar ôl i’r taliadau dros ben gwirfoddol a gorfodol cael eu didynnu) felly mae angen i chi allu ei fforddio.

Er enghraifft

Dychmygwch eich bod yn bacio’n ôl i folard ac yn gwneud gwerth £300 o ddifrod i’ch car. Os ydy’ch tâl-dros-ben yn £150, bydd tâl o £150 yn cael ei wneud i chi. Ond os byddwch chi’n gwneud hawliad, byddwch chi’n colli’ch bonws dim hawliadau ac yn gwthio pris eich premiwm i fyny.

Ydych chi’n debygol o wneud hawliad?

Os nad ydych, byddai cystal i chi gynyddu’ch tâl-dros-ben (ar yr amod y gallwch fforddio hynny) a thalu llai am y polisi. Cofiwch hefyd, yn anffodus, hyd yn oed os na fyddwch yn gwneud hawliad, mae’n rhaid ichi ddweud wrth eich yswiriwr eich bod chi wedi cael damwain a gallai’ch premiwm godi o ganlyniad.

3. Chwiliwch am y fargen orau

Mwyaf i gyd o amser ac ymchwil a wnewch i gaffael dyfynbrisiau, y mwyaf tebygol ydych chi o gael gwell bargen. Mae hyn yn hynod bwysig os ydych chi dros 70 oed neu o dan 25 oed, ac wrth adnewyddu’r flwyddyn gyntaf pan fydd premiymau’n gallu codi’n sylweddol.

Os oes amser gyda chi, mynnwch ddyfynbrisiau o ddau safle cymharu o leiaf a defnyddiwch yswirwyr a broceriaid nad ydynt yn cael eu cynnwys ar safleoedd cymharu. Cofiwch, nid y rhataf yw’r gorau o reidrwydd. Mynnwch yr yswiriant iawn neu ni fydd eich polisi’n talu pan fydd arnoch ei angen.

Gweler canllaw MoneySavingExpert i ddefnyddio safleoedd cymharu ar gyfer dyfynbrisiau yswiriant car. (nawr yn eiddo i Money Supermarket)

Darllenwch ein canllaw – Sut i brynu yswiriant gan ddefnyddio safleoedd cymharu

Cymharwch debyg wrth ei debyg – os ydych ond yn chwilio am fargenion hollgynhwysfawr, gallwch ddefnyddio system gymharu Defaqto.

Cymharwch bolisïau yswiriant car ar wefan Defaqto

Rhowch gynnig ar frocer i weld a allant gael yr un yswiriant am bris is – gallwch ofyn am ddim.

Dewch o hyd i frocer trwy Gymdeithas Broceriaid Yswiriant Prydain

Heb lawer o amser?

Defnyddiwch y tablau bargen orau i gymharu polisïau rhai yswirwyr dibynadwy.

Edrychwch ar fargenion gorau Which? ar gyfer yswiriant car

O dan 25 mlwydd oed?

4. Gwiriwch y polisi

Darllenwch y dogfennau Ffeithiau Allweddol a Geiriad y Polisi. Fel arall, ni fyddwch yn gwybod ydych chi’n cael yr yswiriant iawn. Os ydych chi’n adnewyddu polisi gyda’r un yswiriwr, chi ddylai wirio a ydy’r amodau a thelerau wedi newid.

5. Gofynnwch am ddisgownt

Ewch nôl at eich yswiriwr presennol a gofynnwch iddynt guro’ch dyfynbris gorau.